Nairobi (PP) - Musharraxa Xisbiga ODM Mr. Kolonzo Musyoka ee doorashooyinka madaxweynenimo ee dalka Kenya ayaa ka dhawaajiyay inuu ka shaqeynayo nabadda Somalia, isagoo sheegay in dhibaatada ka taagan Somalia ay tahay mid sii adkaanaysa.

Kilonzo Musyoka, wuxuu sheegay in haddii isaga loo doorto Madaxweynaha cusub ee dalka Kenya ay dowladdiisu mudnaanta koowaad siin doonto barnaamijka dib u heshiisiinta Somalia, isagoo sheegay inuu wadahadallo ka dhex billaabi doono kooxaha isku haysta talada dalka Somalia.

"Waxaan dadaal weyn u galayaa inaan ka shaqeeyo nabad ka dhalata dalka Geeska Afrika ku yaalla ee Somalia, waana taas howsha ugu horreysa ee aan qaban doono, marka la ii doorto Madaxweynaha Kenya" ayuu yiri Musharraxaan oo rajo wanaagsan ka muujiyay inuu noqonayo Madaxweynaha cusub ee Kenya.

Sidoo kale; Musyoka, wuxuu ka dhawaajiyay inuu gacan weyn ka geysan doono in Bulshada Soomaaliyeed ay ka mid noqdaan bulshada Bariga Afrika, wuxuuna carrabka ku dhuftay inay xaqiiqjin doonaan nabad ku soo laabata Somalia, isla markaana la mideeyo Shacabka Soomaaliyeed.

"Dajinta Xaaladda Somalia waxaan u adeegsan doonnaa khibrad, waxaana xoogga saari doonnaa inaan helno halka ay sartu ka qurunsan tahay, ayna ku booriyaan Soomaalida inay ka shaqeeyaan nabadda dalkooda" ayuu yiri Mr. Kilonzo Musyoka oo kula hadlayay taageerayaashiisa Garoonka Malindi ee Magaalada Nairobi.

Maxamed Xuseen Jantiile
Wakiilka Puntlandpost - Muqdisho
E-mail: Jantiile@gmail.com