Muqdisho (PP) - Guddoomiyaha Baarlamaanka Somalia Sheekh Aadan Max'ed Nuur (Sheekh Aadan Madoobe) oo maanta booqasho ku tagay Golaha Shacabka oo ay dhismo ka socoto ayaa ka dalbaday hay'adaha caalamka inay gacan ka geystaan dhismaha xaruntan.

Sheekh Aadan Madoobe wuxuu ugu baaqay shacabka iyo hay'aduhu inay qayb ka bixiyaan dhaqaalaha lagu dhisayo xarunta golaha shacabka, halkaasoo la doonayo inay ku qabsoomaan shirarka baarlamaanka.

"Hay'adaha gargaarka iyo cid walba oo wax haysata waxaan ugu baaqayaa inay qayb ka qaatan dhameystirka dayactirka ka bilowday Golaha shacabka, si ay xubnaha baarlamaanku ugu kulmaan waqti dhow" ayuu yiri Sheekh Aadan Madoobe.

Guddoomiyaha Baarlamaanka oo saxaafadda kula hadlay golaha shacabka oo ay ka socdaan dayactirro aan xoog badnayn ayaa sheegay in Engineerradii dhisay oo u dhashay dalka Taliyaaniga ay ballanqaadeen inay bixin doonaan fikir iyo kharash.

"Baarlamaanka ayaa lagu wadaa inay kulammadooda dhawaan ku qabsadaan golaha shacabka, sidaa daraadeed cid walba oo gacan ka geysan karta dhismahooda, waan soo dhaweynaynaa" ayuu yiri Sheekh Aadan Madoobe.

Golaha Shacabka oo ku dhow Madaxtooyada iyo Masjidkii Isbahaysiga Islaamka ayaa waxay noqonaysaa markii ugu horreysay oo lagu bilaabo dayactir tan iyo markii ay dhacday dowladdii dhexe ee Somalia 1991-kii.