Muqdisho (PP) - Wasiirka Ammaanka Qaranka Somalia C/llaahi Sanbololshe ayaa sheegay in dowladda Somalia aysan duqeyn u geysan goobaha ay shacabku ku nool yihiin xilliyada ay dagaallada kula jirto kooxaha kasoo horjeeda.

"Ciidamada Dowladda iyo kuwa AMISOM ma jiraan goobo ay shacab ku sugan yihiin oo ay duqeeyaan, runtiina markii dagaal dhaco cid walba waxay ku tashanaysaa inay nafteeda difaacato, waana dhacaysaa in goobo shacab ay hub ku dhacaan" ayuu yiri Wasiirka oo wareysi bixiyay.

Wasiirku wuxuu sheegay in dowladdu ay qaadayso dagaal ka dhan ah kooxaha kasoo horjeeda, si ay uga saarto goobaha ay gacanta ku hayso, wuxuuse ka gaabsaday inuu sheego xilliga uu weerarku bilaabanayo.

"Dowladda waajib ayaa ka saaran inay dadkeeda badbaadiso, waana taas sababta keentay inay go'aasato dagaal, ciidamadeeda waa u diyaar, dhawaan ayaana la qaadi doonaa dagaal" ayuu yiri Wasiirka oo la hadlay BBC-da.

Sidoo kale wasiirka ammaanka Qaranka Somalia wuxuu sheegay in DFKMG ah ay ku kalsoon tahay ciidamadeeda, wuxuuna gaashaanka ku dhuftay in ciidamada ay waxyeello u geysan karaan shacabka.

Booqasho uu dhawaan ku tagay Magaalada Gaalkacyo ayuu wasiirku sheegay inuu kula kulmay saraakiil ka tirsan Dowladda Somalia iyo Culummada Ahlusunna, isagoo sheegay inuu kala hadlay ammaanka guud ee dalka.