Muqdisho (PP) - Kooxo hubeysan ayaa waxay maanta ku toogteen gudaha suuqa weyn ee Bakaaraha sarkaal sare oo ka tirsan Ururka Xisul Islaam, kaasoo lagu magacaabi Jiray Barre Cali Barre.

Sakaalkan ayaa waxaa toogtay kooxo hubeysan sida ay sheegeen xubno sarsare oo ka tirsan Ururkan waxaana uu u dhintay dhowr xabbadood oo madaxa looga dhuftay isagoo ku dhacay goobtii lagu toogtay.

Goobjoogayaal ayaa sheegay in sarkaalkan uu isdifaacay balse la toogtay, iyadoo kooxaha dilkiisa ka dambeeyay ay baxsadeen, waxaana Madaxa wafaafinta ee Ururka Xisbul Islaam uu sheegay in weerarkaas uu ahaa mid ay geysteen kooxo burcad ah.

"Waxaa dilkan ka dameeyay kooxo burcad ah aad ayaana uga xunnahay dilka loo geystay marxuumka" ayuu yiri Sheekh Maxamed Macallin Cali isagoo intaas ku daray inay kasoo saari doonaan war saxaafadeed.

Ma jirto koox sheegatay inay ka dambeysay dilka marxuumka, kaasoo horay uga soo horjeestay ku biiriddii uu dhawaan Sheekh Xasan Turkey ku biiray Kooxda Al-shabaab, iyadoo habeenkii uu hadalkaas sheegay la weeraray.

Dilka sakaalkan ayaa imaanaya iyadoo uu jiro khilaaf aad u xooggan oo u dhexeeya Xarrakatul Shabaabul Mujaahiidiin iyo Xisbul Islaam oo dhinac uga soo wada-jeeday Dowladda Somalia.