Muqdisho (PP) - Guddi ka tirsan Qarammada Midoobay oo baaritaanno ku sameyay gargaarka la geeyo Somalia ayaa sheegay in la musuq-maasuqo gargaarka laguna kala iibsado suuqyada waaweyn ee Somalia.

Warbixin arrintan ku saabsan oo lagu daabacay wargeysyo kasoo baxa dalka Maerykanka ayaa lagu sheegay in gargaarka ay musuqmaasuqaan Hay'adaha Qarammada Midoobay iyo Qandaraas-layaasha la shaqeeya.

Guddigan ayaa sidoo kale sheegay in wasiirrada Dowladda Somalia ay si aan sharci ahayn u Isticmaalaan Fiisooyinka ama dal-ku-gallada ay ka helaan dalalka calaamka, gaar ahaan kuwa Yurub iyo America ku yaalla.

Waxay sheegeen in fiisooyinka qaarkood lala gato kooxo burcadbadeed ah oo xiriir la leh wasiirrada, iyagoo xusay in lagu sameeyo baaritaanno labadan arrimood si wax badan looga ogaado, inkastoo wasiirrada DFKMG ah ay diideen eeddaas.

Xoghayaha guud ee Qarammada Midoobay ayaa si gaar ah looga codsaday inuu ku sameeyo baaritaano gargaarka la la lunsado iyo fiisooyinka la siiyo Madaxda Dowladda si ay ugu booqdaan dalalka calaamka.

Afhayeen u hadlay Hay'adda WFP ayaa iska fogeeyay eedeyntaas, balse wuxuu sheegay inay baaritaano ku sameyn doonaan eedaha loo soo jeediyay, iyadoo horay uu Mareykanku u joojiyay gargaarkii uu siin jiray Somalia.