Caabud-waaq (PP) - Ciidamo Ethiopian ah oo soo gaaray gallinkii dambe ee shalay degmada Caabud-waaq ee Gobolka Galguduud ayaa waxay isaga baxeen halkaas saakay waaberigii hore.
Ciidamadaan markii ay gaareen Degmadaas waxay sheegeen inay ku wajahan yihiin dhanka Degmada Dhuuso-mareeb ee xarunta gobolkaas, balse ay ku sugnaanayaan degmada caabud-waaq inta uu waagu ka baryayo.
Saakay ayaa la arkay iyadoo ciidamadii Itoobiyaanka ahaa ee soo gaaray degmadaas ay ka baxayaan halkaas, waxaana dadka degmadaas oo ka mid ah degmooyinka ugu xasilloon Gobolka Galguduud ay arkeen ciidamada oo ku raran gaadiidkooda una jahaystay dhanka xuduudda Ethiopia ee ay ka yimaadeen markii hore.
Warar ayaa waxay sheegayaan in saraakiisha ciidamadaan watay ay kulammo la yeesheen mas'uuliyiinta Degmadaas, iyagoo kala hadlay sida ay wararka la helayo tibaaxayaan xaaladda ammaanka ee Degmadaas iyo sidoo kale in maamulka degmadaas ay la shaqeeyaan ciidamada Ethiopian-ka ah ee ku sugan deegaanka Kala-bayrka ee Gobolka Hiiraan oo ah xarunta ugu weyn ee Ciidamada Ethiopia ay ku leeyihii Gobollada Dhexe.
Ma jiraan wax hadal ah oo kasoo baxay dhanka maamulka Degmadaas oo ku saabsan wadahadalladii ay la qaateen saraakiisha Ethiopia, waxayna ku gaabsadeen oo qura inay kala hadleen ammaanka Degmada iyo deegaannada ku xeeran.
Maxamed Xuseen Jantiile
Wakiilka Puntlandpost – Muqdisho
Ramaas Software
