Al-xamdulilaah:-Dagaal shalay dhexmaray Ciidanka Puntland ee fadhiya kaantaroolka magaalada Al-xamdulilaah iyo Maleeshiyo u socotay magaalada Boosaaso oo doonayay in ay gacan siiyaan furitaanka makiinad ballaaran oo ka mid ah Makiinadaha soo saara lacagta faalsada ah oo dawladdu ay xayiraad ku soo rogtay ayaa dagaal dhexmaray wuxuu sababay dhimasho 2 ka mid ah maleeshiyada iyo 1 askari waxaana dhaawacantay illaa 7 ruux.

Ciidanka Puntland ayaa diiday in Maleeshiyadan oo hub watay in ay u gudbaan magaalada Boosaaso.

Ma jiraan wax war ah oo wali ka soo baxay dawlada oo ku aadan amuurtan , sidoo kale maleeshiyada ayaa waxaa la sheegayaa in ay ku sugan yihiin isla aaga wadada laamiga ah ee magaalada Kobta.

Maamulka Puntland ayaa dhawaan wuxuu xayiraad ku soo rogay Makiinadaha waawayn ee sida lixaadka leh u daabici-jiray lacagta faalsada ah ee sicir-bararka keentay taa soo gallaafatay ama waxyeelaysay nolosha boqolaal qof oo u badan dadka danyarta ah.

Hase ahaatee , ka sokow xayiraada daabacadaha makiinadahan ayaa waxaa la sheegayaa in ay dawladdu ay wali si xawli ah ay lacag faalso ah oo ay ku soo daabacay dalka dibadiisa ay si toosa uga soo dajiso garoonka Boosaaso.

Waana sababta keentay in ay Ciidamo-beeleed ay samaystaan dadkii iska lahaa Makiinadaha oo ku doodaya in ay dawladdu ay ka baxday heshiis la gaaray oo sheegayay in aan wax lacag ah lagu daabici-karin dalka gudihiisa islamarkaasna aan laga keeni karin dalka dibadiisa.