Garoowe:-Shirwayne ballaaran oo muddo 5 maalmood ah uga socday magaalada Garoowe odayaal dhaqameedka Puntland oo loogu looga hadlay qodobo ay ka midyihiin ammaanka, Garsoorka, Xuquuqul insaanka iyo dhawrista deegaanka oo ay soo qabanqaabisay hay’adda HORNPEACE ayna maalgalisay UNDP ayaa gabagabadii maanta waxaa laga soo saaray baaq ka kooban 16 qodob oo ka hadlaya dhammaan qodobada kor ku xusan.
Ka hor intaan baaqa la akhrin ayaa halkaasi waxaa ka hadlay Issimo, Odayaal dhaqameed iyo masuuliyiiin katirsan Puntland, Agaasimaha Guud ee Wasaarada Amniga Puntland Cali Maxamed Cabdirixmaan (Cali hayaan) ayaa wuxuu sheegay isaga oo ku hadlaya afka dawlada in uu aad ugu faraxsan yahay baaqa laga soo saaray kulankan, wuxuuna sheegay in uu quudaraynayo in maamulka Puntland uu kaalin mug wayn leh ka qaadan doono la shaqaynta iyo ka warqabka odayaal dhaqameedka oo uu sheegay in aysan helin xaquuqihii ay lahaayeen.
Nabadoon Khaliif Aw-cali ayaa isagoo ku hadlaya magaca ka qaybgalayaasha shirka ayaa wuxuu mahadnaq ballaaran u jeediyay hay'adihii soo qabanqaabiyay kulankan wuxuuna ka warbixiyay kulamo hore oo uu ku sheegay in ay ahayeen kulamo gogol xaar ah oo ay soo qabteen ku waa soo ka horeeyay ka hor isbadalka ka dhacay Puntland ee lagu doortay madaxda cusub ee Puntland.
Suldaan Siciid Maxamed Garaase ayaa mahadnaq ballaaran u jeediyay hay’adda HORNPEACE wuxuuna sheegay in siminaarkan uu yahay mid ay gaar u leeyihiin dadka dhaqanka uuna filayo in ay hay’adu ay waxbadan ka qaban doonto Puntland oo ku aadan dhammaan baaqa la soo saaray, wuxuuna codsaday in la hirgaliyo baaqa la soo saaray ee aan meesha looga tagin.
Suldaanku guulaha shirka lga gaaray ayuu mid ka mid ah ku tilmaamay in ay ka mid tahay odayaal dhaqameedka Puntland oo isbartay oo kawada hadlay arimaha muhiimka ah ee dalka, wuxuuna odayaal dhaqameedka ka codsaday in ay kala qortaan teleefoonada si ay u wada xiriiraan haddii ay meel dhibaato ka dhacdo.
Suldaanku ugu dambayntii wuxuu Alle ka baryay in uu sharaftii iyo qarankii Soomaaliyeed uu soo cesho dhibaatada dhacdayna wuxuu sheegay in ay tahay mid ay Ummadda Soomaaliyeed ay galeen.
Maxamed Ismaaciil oo ka socday hay’adda HORNPEACE ayaa aad ugu mahadnaqay ka soo qaybgalayaasha wuxuuna sheegay in si diiran oo niyad sami ah ay uga qaybqaateen mudadii uu socday shirku ayna wakhtigooda qaaliga ah u hureen hirgalinta shirka.
C/rashiid Maxamed Xirsi Guddoomiyaha Golaha Wakiiladda Puntland oo kulankan xiray ayaa mahadnaq u jeediyay hay’adihii soo qabanqaabshay wuxuuna odayaasha ka codsaday in markasta la yeesho wadatashi ka dhaxeeya odayaasha dhaqanka.
Sawiro-badan
Kulankan ayaa wuxuu noqonayaa kii ugu horeeyay ee odayaal dhaqameedka Puntland ay iskugu yimaadaan oo ay ka soo saaraan baaq noocaan oo kale ah oo ay u wada dhan yihiin iyadoo dhowr jeer oo hore odayaal dhaqameedku ay iskugu yimaadeen kulamo ay ku tilmaameen gogol xaar.
Axmed C/salaam (PP)
Puntlandpost,Garoowe
Loole25@hotmail.com
Ramaas Software
