Muqdisho (PP) - Madaxweyaha dalka Jabuuti Ismaaciil Cumar Geelle ayaa talooyin iyo dardaaran isla socda u jeediyay Madaxda Somalida iyo mudanayaasha baalamaanka, kaddib qadosharaf uu ugu sameeyay Hotelka Kampisky ee Magaalada Jabuuti.

Geelle wuxuu si weyn uga hadlay khilaafyada maamulada Somalia hareeray ee sababay inaysan Somalia ka bixin dagaalada sokeeye iyo rabshadaha aan dhamaadka lahayn.

"Madaxweyne hortaa waa la soo shaqeeyay, waxaana jiray madaxweynayaal badan, balse adiga waad ka duwan tahay kuwaas, waayo waxaa tahay nin dhallinyaro ah oo lagu yaqaano Diin, laguna yaqaan waxqabad wanaagsan, waxaana lagaa doonayaa inaad dalka Somalia ka samatabixiso dhibaatada" ayuu Geelle kula dardaarmay Madaxweynaha Somalia Sheekh Shariif Sheekh Axmed.

Sidoo kale wuxuu dardaaran kaas la mid ah u jeediyay ra'iisul wasaare Cumar C/rashiid Cali Sharma'arke, isagoo sheegay inuu yahay mas'uul uu dhalay madaxweyne xilkas ahaa, lagana doonayo inuu ka fogaado khilaafaadyadii ragaadiyay xukuumadihii hore, uuna si toos ah ula shaqeeyo Madaxweynaha iyo qaybaha kale ee Dowlada.

"Guddoomiyaha baarlamaanka waxaan kula dardaarmayaa inuu ka fogaado eex, qabiil iyo nin jeclaysi, uuna ugu shaqeeyo dalkiisa iyo dadkiisa si waafaqsan sharciga, isla markaana golaha baarlamaanka uu ku boorriyo inay noqdaan kuwo u shaqeynaya dalkooda" ayuu isagana kula dardaarmay guddoomiyaha baarlamaanka Sh. Aadan Madoobe.

Madaxweyne Geelle wuxuu xildhibaanada baarlamaanka ka codsaday inay dalkooda u shaqeeyaan ayna khilaafaadyada joojiyaan, isagoo ku yiri: "Ha u arkina inaad dhexfadhidaan baarlamaanka Ingiriiska, marka aad doodaha leedihiin ee ogaada inay idin sugayaan dad dhibaatooyin ay soo daashadeen".

Ismaaciil Cumar Geelle wuxuu si aad ah u amaanay Haweenka Soomaaliyeed isagoo ku sheegay inay yihiin kuwa ugu badan ee ay dhibaatadu ku dhacday, ayna yihiin kuwa keliya ee dalkooda samatabixin kara, isagoo kula dardaarmay inay ragooda u sheegaan inay dhibta joojiyaan.

Dardaarankaan ayaa noqonaya mid ka mid ah dardaarano kala duwan oo uu Madaxweynaha Jabuuti u jeediyay Madaxweynayaashii hore ee Somalia sida C/qaasim Salaad Xasan oo xukuumadii uu hoggaaminayay lagu dhisay Jabuuti.