Muqdisho (PP) - Qaraxyo aan la sheegin khasaare ay geysteen ayaa maanta ka dhacay hareeraha Suuqa weyn ee Bakaaraha oo u muuqday mid ka baxaya xirnaan uu toddobaadyadii ugu dambeeyay xirnaa, waxaaan qaraxyadaan oo gaaraya shan qarax ay ka dhaceen Isgoysyada H/wadaag iyo Bakaaraha.

 

Kooxo aan la garanayn ayaa qaraxyadaan la eeganayay ciidammada booliis DFS oo ku sugan waddooyinkaas ilaalana ka haya, iyadoo kooxaha tuuray qaraxyadaas ay baxsadeen markii ay fuliyeen qaraxyadaas.

 

Ciidanka ayaa waxay ku jawaabeen rasaasta ka dhacda qoryaha fudud, taasoo keentay inay dadkii ku sugnaa goobaha ku dhow halka ay qaraxyadu ka dhacee ay kala firxadaan, waxaana xirmay ganacsigii goobahaas oo ganacsatadu ay dhexda uga jiraan.

 

Waddooyinka laga galo iyo kuwa laga baxo ee bakaaraha oo ahaa kuwo kooban ayay  billaabeen booliisku qaraxyadaas kaddib inay xiraan ayna dadka iyo gaadiidkaba u diidaan inay maraan halkaas, taasoo keentay in dadkii bakaaraha u soo shaqo tagay ay ku xaryinaadaan muddo dheer gudaha Bakaaraha.

 

Xilli dambe kaddib ayaa waxay billaabeen booliisku inay furaan waddooyin kooban si ay dadku uga baxaan, iyagoo feejignaan dheeraad ah muujinayay, dadkuna waxay ahaayeen kuwo cabsi ka qabay inay qaraxyo kale dhacaan.

 

Bakaaraha ayaa dhawaan ka baxay xayirnaan muddo toddobaadyo ah, taasoo ay sababeen dagaallo ka dhacay daafaha Suuqa weyn ee Bakaaraha, waxaana uu u muuqdaan bakaaraha mid dib ugu laabanaya rabashado iyo fowdo.

 

Maxamed Xuseen Jantiile

Wakiilka Puntlandpost – Muqdisho

E-mail: Jantiile@gmail.com