Xarardheere (PP) - Laba qof oo ka mid ah kooxo burcadbadeed ah oo xalay ku dagaalamay gudaha degmada Xarardheere ee Gobolka Mudug ayay dhaawacyo kala duwan soo gaareen.

Goobjoogayaal ayaa sheegay in dagaalka kooxahan uu ka bilowday markii ay isku qabsadeen lacag madaxfurasho ah oo laga qaatay Markab nooca kalluumeysiga ah oo laga leeyahay dalka Spain.

Markabka ayaa waxaa la siidaayay kaddib markii uu heshiis hoose dhexmaray xukuumadda Spain iyo kooxaha afduubka ku haystay, iyadoo markabka iyo 36-shaqaale ah oo la socday laga qaatay lacag gaaraysa 3.5.-Milyan Dollar.

"Dagaal aad u culus ayaa dhexmaray kooxahan oo mid ka mid ah ay dhaliishay lacagtii loo qoondeeyay, wuxuuna socday qadar kooban, mana jirto wax heshiis ah oo ay weli labadan kooxood gaareen" ayuu yiri guddoomiyaha degmada Xarardheere.

Mas'uulkan wuxuu inaysan jirin wax xiisado ah oo saakay jira degmada, lana wado dadaallo lagu dhexdhexaadinayo labada dhinac, inkastoo koox walba ay ku adkeysanayso mowqifkeeda ku aaddan lacagta Madaxfurashada ah ee ay heleen.

Xarardheere ayaa ah saldhigga labaad ee ugu weyn kooxaha afduubka ka geysta biyaha Somalia, iyadoo dagaalkan uusan ahayn kii ugu horreeyay oo dhexmara, balse ay ka horreeyeen dagaallo kale oo khasaarooyin kala duwan ay ka dhasheen.